ՀՀԿԳՄՍ ՆԱԽԱՐԱՐՈՒԹՅԱՆ «ՎԱՆԱՁՈՐԻ Ս. ԹԵՎՈՍՅԱՆԻ ԱՆՎԱՆ ՊԵՏԱԿԱՆ ՊՈԼԻՏԵԽՆԻԿԱԿԱՆ ՔՈԼԵՋ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ ՊԱՇՏՈՆԱԿԱՆ ԿԱՅՔ

ՔՈԼԵՋԻ ՊԱՏՄՈՒԹՅՈՒՆԸ

Վանաձորի Ս.Թևոսյանի անվան պետական պոլիտեխնիկական քոլեջը բավականին հարուստ կենսագրություն ունեցող հաստատություն է: Հարուստ թե իր շրջանավարտներով, թե իր անցած ուղով:

1957թ. օգոստոսի 9-ին Կիրովականում (այժմ` Վանաձոր) հիմնադրվում է սարքաշինական տեխնիկումը, որի տնօրեն է նշանակվում Հայաստանի վաստակավոր ուսուցիչ, այժմ հանգուցյալ Ալեքսանդր Մելիքյանը: Տարիներ շարունակ տեխնիկումը համարվել է Հայաստանի հյուսիսային շրջանի ամենահեղինակավոր հաստատություններից մեկը և շուրջ 29 տարի հանրապետության արդյունաբերական ձեռնարկություններին ապահովել է լավագույն մասնագետներով` տալով 4562 շրջանավարտ:

1986թ. կառավարության որոշմամբ սարքաշինական տեխնիկումը միացվեց Կիրովականում գործող մեկ այլ փառահեղ ուղի անցած քիմիկո-տեխնոլոգիական տեխնիկումին և վերանվանվեց պոլիտեխնիկում: Պոլիտեխնիկումի տնօրեն նշանակվեց Երևանի ճարտարագիտական համալսարանի Վանաձորի մասնաճյուղի երկարամյա դասախոս, դոցենտ Վլադիմիր Մանվելյանը, որն իր վարած ճիշտ գործունեությամբ վերականգնեց տեխնիկումի երբեմնի հեղինակությունը: Սակայն ավերիչ երկրաշարժը իր հետքը թողեց նաև պոլիտեխնիկումի վրա և այն գոյատևեց մինչև 2000թ.: 2000թ. կառավարության որոշմամբ պոլիտեխնիկումը միացվեց քաղաքում գործող միակ` թիվ 47 պրոֆտեխնիկական ուսումնարանին, վերանվանվեց Վանաձորի Ս. Թևոսյանի անվան պետական պոլիտեխնիկական քոլեջ և տնօրեն նշանակվեց բազմավաստակ մանկավարժ Բաղդասար Լոքյանը: Վերջինիս նշանակումը շրջադարձային եղավ հաստատության վերակենդանացման համար: Նա առաջնահերթ համարեց ինչպես աշխատաշուկայում մեծ պահանջարկ ունեցող մասնագիտությունների ներդրումը, այնպես էլ դասախոսական կազմի բարձր մակարդակը` այն համալրելով Վանաձորի պետական մանկավարժական ինստիտուտի և Երևանի ճարտարագիտական համալսարանի Վանաձորի մասնաճյուղի գիտական աստիճան ու կոչում ունեցող լավագույն դասախոսներով: Կտրուկ բարձրացավ քոլեջի հեղինակությունը, ավելացավ դիմորդների քանակը: Քոլեջը կայացավ: Այն իսկական ծաղկուն անդաստան դարձավ թե ուսանողների, թե աշխատողների համար:

2007թ.-ից սկսվեց քոլեջի համագործակցությունը «Անուշավան Աբրահամյան կրթական հիմնադրամ»-ի հետ: Մեծ է «Անուշավան Աբրահամյան կրթական հիմնադրամ»-ի դերը մեր քոլեջում: Անուշավան Աբրահամյանը սփյուռքի այն երախտավորներից է, որն ապրելով օտար հողում հոգում է մեր այսօրվա, վաղվա օրվա մասին, այր, որին հայ ժողովրդի անցած տառապանքը սովորեցրել է հայ մնալու գաղտնիքը, և որի համար հայ ժողովրդի սոցիալական ծանր վիճակը դարձել է առաջնահերթ խնդիր: Նրա կատարած գործերը, որոնք բոլորն էլ սրտի կանչով է կատարում, ոգևորում են քոլեջի թե աշխատողներին, թե սովորողներին: Տնօրեն Բ.Լոքյանի նախաձեռնությամբ և «Անուշավան Աբրահամյան կրթական հիմնադրամ»-ի աջակցությամբ քոլեջում կահավորվեց և հիմնադրվեց կարի, վարսահարդարների, խոհարարների արհեստանոցները, համակարգչային կաբինետը, հիմնովին վերանորոգվել է շենքի տանիքը, ներ է դրվել ջեռուցման համակարգը:


2010թ.տնօրեն Բ.Լոքյանը անցավ վաստակած հանգստի և տնօրեն նշանակվեց նույն քոլեջի երկարամյա փոխտնօրեն, իր գործի գիտակ Արշակ Թումանյանը, որն էլ ավելի աշխուժացրեց համագործակցությունը «Անուշավան Աբրահամյան կրթական հիմնադրամի»-ի հետ. հիմնադրամի աջակցությամբ բացվեց ատաղձագործական և ներքին հարդարման աշխատանքների արհեստանոցները:

Հիմնադրման օրվանից մինչ օրս կրթօջախը ընդգրկված է Հայաստանի կրթության ոլորտը ղեկավարող պետական գերատեսչության կառույցի կազմում: Քոլեջն ունի իր անվանական հուշամեդալը, որին 2007թ. մինչ օրս արժանացել են բարերար Անուշավան Աբրահամյանը (2009թ.), ՀՀ նկարիչների միության անդամ, քոլեջի աշխատակից Կարլեն Քոչինյանը(2011թ.) և երկարամյա ամբասիր աշխատանքի համար տնտեսագիտության դասախոս Ամալյա Հովհաննիսյանը(2012թ.):

Այսօր քոլեջում կրթությունը իրականացվում է երեք կրթական ծրագրերով` միջին մասնագիտական, նախնական մասնագիտական (արհեստագործական) և լրացուցիչ: Այս բոլոր կրթական ծրագրերով քոլեջում սովորում են շուրջ 250 ուսանող: Միջին մասնագիտական կրթական ծրագրերով ուսուցումը կատարվում է ինչպես առկա, այնպես էլ հեռակա բաժիններում: Այսօր քոլեջում գործում են հետևյալ մասնագիտությունները.



ՄԻՋԻՆ ՄԱՍՆԱԳԻՏԱԿԱՆ ԿՐԹԱԿԱՆ ԾՐԱԳՐԵՐՈՎ

«Դասավանդում տարրական դասարաններում»

«Նախադպրոցական կրթություն»

«Հաշվապահական հաշվառում»

«Գրադարանային գործ»:

ՆԱԽԱՄԱՍՆԱԳԻՏԱԿԱՆ ԿՐԹԱԿԱՆ ԾՐԱԳՐԵՐՈՎ

«Ոսկերչություն»

«Կարի արտադրության տեխնոլոգիա»

Լրացուցիչ: